Levo unha tempada na que as miñas [escasas] publicacións teñen como protagonista a Coral Polifónica de Piloño (Vila de Cruces). Esta colaboración naceu un pouco da casualidade, coma tantas cousas: eles coñecíanme, querían gravar algunhas das súas actuacións, eu estaba dispoñible…

O pasado 28 de decembro gravei en Piloño un Concerto de Nadal no que actuaban catro corais, entre elas a anfitriona, que aproveitou a ocasión para facer a estrea mundial dunha habanera titulada Fúcheste un día. Antes de que soase a habanera falou Pablo Viz, o autor da letra, quen loou o labor que realizan as corais populares en canto axentes de dinamización sociocultural das parroquias e das comarcas nas que desenvolven a súa actividade. É unha riqueza impagable a cuxa dimensión son incapaz de porlle medida, engadiu Pablo léndonos o pensamento a todas as persoas que abarrotabamos o recinto.

Agora déixoche un vídeo coa presentación de Pablo e a interpretación da habanera.

Se queres un resumo máis amplo do recital podes velo en YouTube [aquí] ou en Vimeo [aquí]

Viaxas rodeado de xente acatarrada e afónica e pensas que alguén terá que obrar un milagre para que dean cantado. E van e cantan coma se nada. Bravo!

Tamén en Youtube aquí.

Auditorio Xosé Casal (Vila de Cruces), 30 de novembro de 2013.

Tamén en YouTube [aquí]

Remata agosto e xa se notan cambios en Cachóns.  Hai novas cores e a luz parece máis amable.

As imaxes que hoxe ofrezo están gravadas cunha EOS 60D, unha cámara de fotos que tamén ofrece a posibilidade de facer vídeo. Non ten enfoque automático, o que en condicións normais é un atranco para gravar con ela. A cambio, ofrece a posibilidade de xogar cos desenfoques…

Tamén en YouTube: aquí.

A Coral Polifónica de Piloño viaxou o 10 de agosto a Pontedeume para participar no X Festival de Habaneras. O certame estaba programado para finais de xullo, pero foi aprazado en sinal de loito pola traxedia ferroviaria de Angrois.

Convidáronme a ir coa cámara e aceptei encantado. Gústame estar con xente que fai as cousas polo pracer de facelas.

Tamén en YouTube [aquí]

O día 24 de maio tivo lugar en Silleda a gala de entrega de premios da terceira edición do Videoghit, un certame que organiza a xente do IES Pintor Colmeiro e que fomos seguindo na web eticolmeiro.com.

As nominacións e os premios estiveron bastante repartidos, pero houbo un traballo que causou sensación. Aquí o tes.

Para os e as moi fans deixo este resumo da gala

o río que flúe e o tempo que foxe… [pode que a máis vella de todas as metáforas]

Tamén en YouTube [aquí]

Na sobremesa acabamos falando do feísmo. Soe dicirse que as comparacións son odiosas, e ata pode que sexa certo, pero ningún dos presentes era quen de evitar ceder á tentación de cotexar o que nos salta á vista por estes pagos co que pode verse noutras zonas do norte peninsular. Lembrei a miña viaxe primaveral á zona rural de Euskadi, un exemplo de intervención urbanísitica harmónica e respectuosa co hábitat, e pregunteilles aos meus acompañantes polas razóns de tan clamorosa diferenza. Eles, que son ben máis racionais do que son eu para estas cousas, puxeron sobre a mesa algunhas explicacións ben fundamentadas en cuestións históricas e demográficas.

Onte fun dar un paseo pola parroquia de San Xián de Sales, limítrofe da miña, e fíxen a foto deste buzón. Que ninguén pense que este apaño leva alí uns días, porque xa pasou máis dun ano desde que o vin por primeira vez. Na finca hai unha casa de pedra en boas condicións, do que deduzo que esa obstinación en manter este buzón é a manifestación dunha vontade estética radical. A Atracción do Abismo, sentenciou Lois Pereiro.